1 
0 Epstein Files new Release by DOJ: નવા જાહેર થયેલા દસ્તાવેજોમાં મનોરંજન, રાજકારણ, વ્યવસાય અને ફેશન જગતની અનેક જાણીતી હસ્તીઓના નામ અને ફોટોગ્રાફ્સ જોવા મળ્યા, અહીં જુઓ તમામ વિગતો
અમેરિકાના ન્યાય વિભાગે જેફ્રી એપ્સ્ટીનના સેક્સ ટ્રાફિકિંગ સંબંધિત કેસનો એક મોટો દસ્તાવેજ જાહેર કરી દીધો છે. આ ખુલાસામાં અમેરિકાના પૂર્વ પ્રમુખ બિલ ક્લિન્ટન, માઈકલ જેક્સન સહિત અનેક મોટી હસ્તીઓની તસવીરો સામે આવી છે. જોકે અમુક તસવીરો રેડેક્ટ (કાળી કરી દેવાઈ) છે.
એપ્સ્ટીન ફાઈલ જાતીય શોષણના કેસના પીડિતોએ આરોપ મૂક્યો હતો કે અમેરિકાના ન્યાય વિભાગે અધૂરી માહિતીઓ શેર કરીને અમારી સાથે દગો કર્યો છે. હજારો પેજના ફોટા અને દસ્તાવેજો એડીટ કરીને જાહેર કરાયા છે. જેના લીધે ગુનેગારો વિશે કોઈ વધુ માહિતી સામે આવી રહી નથી.
એક પીડિતાએ દાવો કર્યો હતો કે અમેરિકન પ્રમુખ ટ્રમ્પનું નામ પણ એક સિવિલ કેસમાં છે. આ કેસ 2020માં દાખલ ગયો હતો. મહિલાના આરોપ મુજબ હું 13 વર્ષની હતી ત્યારે એપ્સ્ટીન અને તેની ગર્લફ્રેન્ડે મારી ભરતી કરી હતી. આ મામલે 1994નો હતો. આ લોકોએ મારી મુલાકાત ટ્રમ્પ સાથે કરાવી હતી. ઉલ્લેખનીય છે કે આ પીડિતાએ અગાઉ 2021માં પણ જુબાની આપી હતી. આ ઉપરાંત 2016 ના એક અહેવાલ પ્રમાણે અમેરિકાની પાંચ પીડિતાએ કહ્યું હતું કે ટ્રમ્પ અમારા ડ્રેસિંગ રૂમમાં અચાનક ધસી આવ્યા હતા ત્યારે છોકરીઓ કપડા બદલી રહી હતી. તેમાંથી ઘણી છોકરીઓની વય તો માત્ર 15 વર્ષ જ હતી. તેમ છતાં આ કેસમાં ટ્રમ્પ સામે કોઈ ગુનો દાખલ નથી.
કુખ્યાત સેક્સ ટ્રાફિકિંગ ગુનેગાર જેફ્રી એપ્સ્ટીન સાથે જોડાયેલા હજારો ગુપ્ત દસ્તાવેજો અમેરિકન ન્યાય વિભાગ (DOJ) દ્વારા જાહેર કરવામાં આવ્યા છે. ‘એપ્સ્ટીન ફાઇલ્સ ટ્રાન્સપરન્સી એક્ટ’ હેઠળ શનિવારે વહેલી સવારે સાર્વજનિક કરાયેલા આ દસ્તાવેજોમાં પૂર્વ રાષ્ટ્રપતિ બિલ ક્લિન્ટન અને પૉપ આઈકન માઈકલ જેક્સન જેવી હસ્તીઓના નામ અને તસવીરો સામે આવતા ખળભળાટ મચી ગયો છે. જાહેર કરાયેલા દસ્તાવેજોમાં કેટલીક એવી તસવીરો છે જે અગાઉ ક્યારેય જોવા મળી નથી.
અન્ય એક ફોટામાં માઈકલ જેક્સન એપ્સ્ટીન સાથે એક એવી પેઇન્ટિંગ સામે ઉભેલા દેખાય છે જેમાં નગ્ન મહિલાનું ચિત્ર છે. એક અન્ય તસવીરમાં ક્લિન્ટન અને જેક્સન સાથે પોઝ આપતા પણ જોવા મળ્યા છે.
માહિતી અનુસાર જેફ્રી એપ્સ્ટીનના રૂમમાં પોપ જોન પોલ સેકન્ડની પણ તસવીર દેખાઈ આવી હતી. આ તસવીર જેફ્રીના રૂમમાં મૂકી રાખવામાં આવી હતી. જ્યારે 7 મહિલાઓના ખોળામાં બ્રિટિશ રાજકુમાર પ્રિન્સ એન્ડ્રુ સૂતેલા દેખાઈ રહ્યા હતા.
અબજોપતિ રિચર્ડ બ્રેન્સનની પણ એક તસવીર સામે આવી છે જેમાં તેઓ જેફરી એપ્સ્ટીન સાથે દેખાય છે. તેમની સાથે તસવીરમાં પાછળ બે છોકરીઓ ઊભેલી દેખાય છે.
આ ફાઇલ્સમાં મિક જેગર, વુડી એલન અને નોમ ચોમ્સ્કી જેવા દિગ્ગજ નામોનો પણ ઉલ્લેખ કરવામાં આવ્યો છે.
ડોનાલ્ડ ટ્રમ્પે નવેમ્બરમાં પસાર થયેલા કાયદા પર હસ્તાક્ષર કર્યા હતા, જે મુજબ 19 ડિસેમ્બર સુધીમાં એપ્સ્ટીન સાથે જોડાયેલી તમામ મહત્વની માહિતી જાહેર કરવી ફરજિયાત હતી. ડેપ્યુટી એટર્ની જનરલ ટોડ બ્લાન્શે જણાવ્યું હતું કે, વિભાગ પાસે લાખો દસ્તાવેજો છે, જેમાંથી એક મોટો હિસ્સો આજે જાહેર કરાયો છે અને આગામી અઠવાડિયામાં વધુ સામગ્રી સામે આવશે. વ્હાઇટ હાઉસના જણાવ્યા અનુસાર, આ પગલું પીડિતોને ન્યાય અપાવવા અને પારદર્શિતા લાવવા માટે લેવામાં આવ્યું છે.
ન્યાય વિભાગે પીડિતોની ઓળખ સુરક્ષિત રાખવા અને બાળ જાતીય શોષણ સંબંધિત સામગ્રીને રોકવા માટે ઘણા દસ્તાવેજો પર કાળી શાહી ફેરવી દીધી છે (Redacted). આ સિવાય રાષ્ટ્રીય સુરક્ષા અને વિદેશ નીતિ સાથે જોડાયેલી સંવેદનશીલ વિગતોને પણ ગુપ્ત રાખવામાં આવી છે. તેમ છતાં, કોલ રેકોર્ડ્સ, ગ્રાન્ડ જ્યુરીની જુબાની અને ઈન્ટરવ્યુના ટ્રાન્સક્રિપ્ટ્સ જાહેર થવાથી ઘણા પ્રભાવશાળી લોકો મુશ્કેલીમાં મુકાઈ શકે છે.
એપ્સ્ટીન ફાઈલને ચાર સેટમાં જાહેર કરવામાં આવી હતી. જેમાં એકમાં કોર્ટ રેકોર્ડ, બીજામાં જસ્ટિસ ડિપાર્ટમેન્ટ દ્વારા કરાયેલા ખુલાસા, ત્રીજામાં માહિતી અધિકાર કાયદા હેઠળ FOIA હેઠળ જાહેર કરાયેલા દસ્તાવેજો અને ચોથામાં કમિટી ઓન ઓવરસાઈટ એન્ડ ગવર્નમેન્ટ રિફોર્મ તરફથી કરાયેલા ખુલાસા સામે છે. આ રેકોર્ડમાં 50થી વધુ કોર્ટ કેસની વિગતો છે.
બિલ ક્લિન્ટનની હોટ ટબમાં દેખાયા
એક તસવીરમાં પૂર્વ પ્રમુખ બિલ ક્લિન્ટન, એપ્સ્ટીનની સહયોગી ઘિસ્લેન મેક્સવેલ અને અન્ય એક અજાણી વ્યક્તિ સાથે ‘હોટ ટબ’માં આરામ કરતા જોવા મળે છે. અમેરિકાના પૂર્વ પ્રમુખ બિલ ક્લિન્ટન સહિત પોપ સિંગર માઈકલ જેક્સન, હોલિવૂડ એક્ટર ક્રિસ ટકર, બ્રિટિશ પ્રિન્સ એન્ડ્રુ જેવા દિગ્ગજોની પણ તસવીરો આ વખતે એપ્સ્ટીન ફાઈનલમાં ખુલી છે. કુલ 4 સેટમાં આ દસ્તાવેજો જાહેર કરાયા છે જેમાં કુલ 3500થી વધુ ફાઈલો છે.
હાલ સુધી જાહેર થયેલી ફાઇલ્સમાં દેખાયેલા કેટલાક જાણીતા નામો
ભૂતપૂર્વ અમેરિકી રાષ્ટ્રપતિ બિલ ક્લિન્ટન
ગાયક માઇકલ જેક્સન
રોલિંગ સ્ટોન્સના ગાયક મિક જેગર
બ્રિટનના પ્રિન્સ એન્ડ્રુ
અભિનેતા કેવિન સ્પેસી
કોમેડિયન ક્રિસ ટકર
સારાહ ફર્ગ્યુસન, પૂર્વ ડચેસ ઓફ યોર્ક
વર્જિન ગ્રુપના સ્થાપક રિચાર્ડ બ્રેન્સન
જાણીતા પત્રકાર વોલ્ટર ક્રોનકાઇટ
સંગીતકાર ફિલ કોલિન્સ
અભિનેત્રી મીની ડ્રાઇવર